شاه اسماعیل صفوی (خطایی):باهارین گلدیگین ندن بیلییم گول دیکنده بیتر، بولبول تالدا‌دیر
❈۱❈
باهارین گلدیگین ندن بیلییم
گول دیکنده بیتر، بولبول تالدا‌دیر
اییوبون تنینده ایکی قورد قالدی
بیری ایپک سارار، بیری بالدا‌دیر
❈۲❈
کؤنلونه گتیرمه شکک ایله گومان
سید نسیمییه دئ، اول اولدو شان
تانری ایله مینبیر کلام سؤیلشن
علی مدینه‌ده، موسا توردا‌دیر
❈۳❈
شریعت یولونو محمد آچدی
تریقت گولونو شاه علی سئچدی
شو دونیا‌دان نئچه یوز مین ار کئچدی
اونلار اتفاقدا، مئهدی یولدا‌دیر
❈۴❈
آدمین، حاتمین ذات-ی فزلوللاه
اشیایی قرق ائتمیش بو بیر سیرروللاه
شاهنشاهی-قوتبی-عالم زیللوللاه
قودرت-ی نظری مؤمن قولدا‌دیر
❈۵❈
شاه ختای آیدیر: سیررینی یایما
قیلا گؤر نامازین قزایه قویما
شو یالان دونیادا هئچ سابام دئیمه
تنین تناشیرده، سیررین سالدا‌دیر
کامنت ها